İlk qış ayınıñ 14-nde Ukrayinanıñ Kıyiv vilâyetiniñ Çayki köyünde ağır hastalıqtan soñ vefat etken qırımtatar faali Ayder Seytosmanovnen vedalaştılar. Qırımtatar resurs merkeziniñ haber etkenine köre, cenaze merasimi "Birlik" medeniyet merkezinde keçirilgen.
Ayder Seytosmanov Qırımtatar halqı Qurultayınıñ delegatı, evelki çağıruv Meclisiniñ azası, milliy areketniñ faal iştirakçisi, yerli öz-özüni idare etüv islâatları meseleleri mütehassısı edi. 2014 senesi Qırım Rusiye tarafından işğal etilgen soñ o, qorantasınen beraber Kıyivge köçti.
Ayder Seytosmanovnı soñki yolğa tuvğanları, dostları, zenaatdaşları, qomşuları ve belli cemaat ve siyasiy erbapları — Qırımtatar halqınıñ lideri Mustafa Cemilev, Meclis reisiniñ muavini İlmi Ümerov, Meclis azası ve QRM-niñ reisi Eskender Bariyev ozğardılar.
Vedalaşuv sözlerini Facebookta QRM-niñ müdiri Zarema Bariyeva derc etti. Onıñ aytqanına köre, Ayder Seytosmanov Qırımtatar milliy öz-özüni idare etüv organlarınıñ Ukrayina yerli öz-özüni idare etüv organlarınen işbirligini pekitmek, ayrıca cenkte ve yañı işğal etilgen topraqlarda territorial cemiyetler vekilleriniñ aqlarını qorçalamaq içün teklifler azırlamaq teşebbüslerinde faal iştirak etti.
Zarema Bariyeva onıñ Qırımda medeniyet ve tasil inkişafına qoşqan issesini ayrıca qayd etti, şu cümleden, Aqmescitte İsmail Gasprinskiy adına kitaphaneniñ teşkil etilmesinde iştirak etkenini, mında müdir muavini olıp çalışqanını ve fondlarnı Qırımtatar tilinde ve Qırımtatarlarnıñ tarihı aqqında kitaplarnen toldurğanını qayd etti.
"2014 senesi Qırım işğal etilgen soñ ailesinen beraber Kıyivge köçti ve çoq yıl devamında Ukrayinada merkezsizleştirüvge qol tutqan İsveç-Ukrayin leyhasında ekspert olaraq çalıştı. O, yerli idare birleşmelerine şekillenmege ve daa demokratik olmağa yardım etti. Ayder ağa Ukrayinada yerli öz-özüni idare etüv inkişafı meseleleri boyunca çeşit neşirlerniñ müellifi edi. Onı Ukrayinanıñ çeşit köşelerinde şeer başları ve territorial cemiyetlerniñ yolbaşçıları tanıy ve ürmet ete ediler. Bütün tecribesini bir kün Qırımda qullana bilecegine ümüt ete edi", — dep qayd etti o.
Seytosmanov ayatınıñ soñki yıllarını Belçikanıñ Gent şeerinde keçirdi, anda ağır hastalıqtan tedaviylev köre edi.
