Rusiye Federatsiyasınıñ Temyiz mahkemesi ukrayin jurnalisti Gennadiy Osmaknıñ qanunsız apis müddetini qısqartmaq istemedi. Bunı Qırımtatar resurs merkezi bildire.
Osmak Geniçeskte yaşağan ve yerli "Novıy vizit" neşrini idare etken edi. 2022 senesi saban ayınıñ 12-nde o, matbuat vastalarında çalışmaycağını bildirgen. 2024 senesiniñ saban ayında Osmaknıñ tutulğanı aqqında belli oldı. İşğalciler onı Noman Çelebicihan adına qırımtatar batalyonında iştirak etkeninde qabaatlaylar. Rusiye Federatsiyasında bu batalyon "terroristik teşkilât" olaraq ilân ettigen. İşğalci "mahkeme" jurnalistni 3 yıl ve 2 ayğa azatlıqtan marum etti.
Erkekni Rusiyeniñ Vladimir vilâyetindeki Melehovo qasabasında 6-ncı sert rejimli koloniyasına etap ettiler. Qırımtatar resurs merkeziniñ qayd etkenine köre, onı esir alğanda, fizikiy ve ruhiy ceetten işkencege oğrattılar, qorantasınen bağını da kestiler. Koloniyağa kelgen soñ yaqınlarına bulunğan yeri aqqında haber etti. Şeker hastalığınıñ tedaviylenmesi içün kerekli ilâcları da yoq. Qorantası ilâclarnı koloniyağa teslim etip olamay, neticede sağlığı bayağı fenalaştı ve bu onıñ ayatı içün telükelidir.
Advokat, jurnalistniñ işğalci akimiyet tarafından çıqarılğan qabaatlavlarnen iç bir alâqası olmağanını qayd etip, apis müddetiniñ qısqartıluvını istegen edi. Amma mahkeme şikâyet arizasını red etti.